Azərbaycan, Bakı, 30 may /Trend/
ARDNŞ-in "Azərikimya" İstehsalat Birliyi rəhbərliyinin Qazaxıstanın Atırau şəhərinin akimi (meri) Serik Aydarbekovun rəhbərlik etdiyi nümayəndə heyəti ilə geniş tərkibli görüşü keçirilmişdir. Bu barədə cümə axşamı Trend-ə İB-dən daxil olan məlumatda deyilir.
"Azərikimya" istehsalat Birliyinin Müşahidə Şurasının sədri, Milli Məclisin deputatı Muxtar Babayev Atırau şəhərinin nümayəndə heyətini salamlayaraq, onlara Azərbaycanda neft-kimya sənayesinin yaranma tarixi və inkişaf mərhələləri, son illərdə bu sahədə aparılan yeniləşmə və müasirləşmə tədbirləri barədə ətraflı məlumat vermişdir.
Atırau şəhərinin akimi bildirmişdir ki, bu il Azərbaycanda işgüzar səfərdə olmuş Qazaxıstan nümayəndə heyətlərinin respublikamızdakı görüşlərini, ölkəmizin neft-kimya sənayesinin inkişafını, respublikalarımız arasında əlaqələrin genişləndirilməsini əks etdirən məlumatların qardaş ölkənin mətbuatında, mərkəzi və regional televiziya kanallarında yayılması Atırau şəhərinin nümayəndələrinin də Azərbaycana, onun neft-kimya sənayesinə olan diqqət və marağını xeyli artırmışdır. Nümayəndə heyətinin Azərbaycana, o cümlədən Sumqayıta bu səfəri də məhz həmin maraqdan irəli gəlmişdir. Nümayəndə heyətinin rəhbəri Atırau şəhərinin iqtisadiyyatı və sənaye müəssisələri haqqında müvafiq məlumat vermiş və Sumqayıtla Atırau şəhərinin qarşılıqlı iqtisadi əlaqələrinin yaradılmasının və genişləndirilməsinin hər iki tərəf üçün səmərəli olacağına inamını ifadə etmişdir.
Görüşdən sonra qonaqlar Azərbaycan neft-kimya sənayesinin inkişafında böyük xidmətləri olmuş Ulu öndər Heydər Əliyevə həsr edilmiş muzey-guşədə respublikamızın neft-kimya sənayesinin inkişaf dinamikasını və ayrı-ayrı mərhələlərini əks etdirən foto-sənədlərlə tanış olmuşlar.
