Azərbaycan, Bakı, 11 dekabr /Trend, müxbir E.İsmayılov/
2013-cü ilin yekunları üzrə Azərbaycanda neft hasilatının həcmləri 44 mln. ton səviyyəsində proqnozlaşdırılır. Bu barədə çərşənbə günü jurnalistlərə energetika nazirinin müavini Natiq Abbasov bildirib.
Onun sözlərinə görə, neft hasilatının həcmi 41,06 mln. ton səviyyəsində proqnozlaşdırılmışdı, lakin faktiki olaraq ilin yekunları üzrə istehsalın artacağı gözlənilir.
Habelə, Abbasovun sözlərinə əsasən, proqnozlara görə, 2014-cü ildə qaz hasilatının həcmi 28 mlrd. kubmetrə çata bilər.
O, bu ilin neft hasilatı proqnozlarına toxunaraq bildirib ki, 2013-cü ildə qaz hasilatı həcmləri 1,5 mlrd. kubmetrlik proqnozu ötür.