Azərbaycan, Bakı, 15 oktyabr /Trend, müxbir Emil İsmayılov/
2014-cü ildə Türkiyənin Xəzər dənizindəki enerji layihələrindən əldə edəcəyi dividentlər 500 milyon dolları ötəcək. Trend-in məlumatına görə, bu barədə "Anadolu" agentliyi Türkiyənin energetika və təbii resurslar naziri Taner Yıldıza istinadən xəbər verib.
T. Yıldız deyib ki, Türkiyənin ötən il Xəzərdəki layihələrdən dividentləri 265 milyon dollar təşkil edib: "Fikrimcə, 2014-cü ildə bu göstərici təqribən iki dəfə çoxdur".
Qeyd edək ki, Türkiyənin TPAO şirkətinin Azərbaycanın "Azəri-Çıraq-Günəşli" dəniz neft-qaz yataqları blokunun işlənməsi layihəsində, həmçinin "Şahdəniz" qaz-kondensat yatağının işlənməsi layihəsində iştirak payı var.
