Bakı. Trend:
Perunun Lima şəhərində Mədən Hasilatı üzrə Şəffaflıq Təşəbbüsünə dair (MHŞT) VII Qlobal Konfrans keçirilib. MHŞT üzrə hökumət komissiyasının sədri, Azərbaycan Respublikası Dövlət Neft Fondunun (SOFAZ) icraçı direktoru Şahmar Mövsümovun başçılıq etdiyi nümayəndə heyəti konfransda iştirak edib.
SOFAZ-dan Trend-ə verilən məlumata görə, konfrans çərçivəsində MHŞT üzrə Beynəlxalq İdarə Heyətinin 32 və 33-cü iclasları keçirilib. Beynəlxalq İdarə Heyəti tərəfindən MHŞT Standartlarına dəyişikliklər edilib, iki ölkəyə (Dominikan Respublikası və Almaniya Federativ Respublikası) namizədlik statusu verilməsi qərara alınıb. Beləcə, MHŞT-ni tətbiq edən ölkələrin sayı 51-ə yüksəlib. 4 ölkə (Konqo Demokratik Respublikası, Qana, Monqolustan və Filippin) "2016-cı il MHŞT Mükafatı"na layiq görülüb.
Konfrans çərçivəsində, həmçinin Beynəlxalq İdarə Heyətinə seçilmiş yeni üzvlər və Beynəlxalq İdarə Heyətinin yeni sədri Frederik Raynfeld konfrans iştirakçılarına təqdim edilib.
"Aşağı xammal qiymətləri dövründə idarəetmənin təkmilləşdirilməsi" adlı paneldə iştirak edən Ş.Mövsümov Azərbaycanın bu sahədə təcrübəsinə dair çıxış edib.
Eyni zamanda VII Qlobal Konfrans çərçivəsində MHŞT üzrə Milli Sərgi keçirilib və Azərbaycan nümayəndə heyəti həmin sərgidə iştirak edib. Milli Sərgidə Azərbaycana aid video və foto materiallar, MHŞT-nin Azərbaycanda tətbiqinə dair müxtəlif broşür və kitabçalar, hesabatlar, xatirə hədiyyələri konfrans iştirakçılarına təqdim edilib.
Qeyd edək ki, MHŞT xüsusi çoxtərəfli və şirkətlər, hökumətlər, sərmayəçilər və vətəndaş cəmiyyəti təşkilatları tərəfindən dəstəklənən könüllü təşəbbüsdür. MHŞT neft, qaz və mədən hasilatı sahəsində şəffaflığın təmin edilməsində qlobal standartdır. Azərbaycan MHŞT prosesinə 2003-cü ildə qoşulub. MHŞT-nin tətbiqi sahəsində əldə etdiyi nailiyyətlərə görə Azərbaycana "2009-cu il MHŞT Mükafatı" təqdim edilib.