Bakı. Trend:
Trans-Adriatik Boru Kəmərinin (TAP) genişləndirilməsi gələcəkdə əlavə həcmdə hidrogen və digər bərpa olunan qazlar nəql etməyə kömək edəcək.
Trend cümə axşamı xəbər verir ki, bunu TAP-ın Yunanıstandakı rəsmi nümayəndəsi İoannis Maris Delfi İqtisadi Forumunda deyib.
"Biz Avropaya 22 milyard kubmetrdən çox təbii qaz tədarük etmişik. TAP-ın mövcud imkanlarını ikiqat artırmaqla regionun enerji səmərəliliyini əlavə olaraq dəstəkləyə bilərik. Genişləndirmənin birinci mərhələsi artıq işə salınıb", - o deyib.
Qeyd edək ki, Azərbaycan Avropaya qaz tədarükünü 31 dekabr 2020-ci ildə başladıb. Cənub Qaz Dəhlizinin Avropa hissəsi olan Trans-Adriatik qaz kəməri (TAP) vasitəsilə kommersiya istismarı başladıqdan sonra ümumilikdə 22 milyard kubmetr qaz nəql olunub. Bu il Azərbaycan Avropaya 12 milyard kubmetr qaz ixrac etməyi planlaşdırır.
(Tərcümə: Rəna Əbdürəhmanova)
Twitter: @Lyaman_Zeyn