Azərbaycan Dövlət Neft şirkəti (AR DNŞ) Gürcüstanın Batumi limanından bir partiya mənfəət neftinin satışı üzrə tenderi bağlı elan edib. AR DNŞ-dən Trend ə verilən məlumata görə, tenderin qalibi Almaniyanın Select Energy GmbH treyderi olub.
Şirkət nümayəndəsinin sözlərinə görə, Select Energy fevralın 3-4-də "Azəri-Çıraq-Günəşli" yataqlar blokundan hasil edilən 80 min ton (600 min barel) Azəri Light növlü neft yükləyəcək.
Batumi neft terminalı ildə 15 mln tona qədər neft yükü daşımaq qabiliyyətinə malikdir. Terminal 4 körpüdə 30-90 min ton dedveytli tankerlərə xidmət edir. Onun rezervuar parkının gücü təxminən 530 min tondur ki, bu da dəhlizdən keçən cari və proqnozlaşdırılan həcmlərin daşınması üçün nəzərdə tutulandan kifayət qədər artıqdır.