Azərbaycanın Nazirlər Kabineti sənaye və energetika Nazirliyinin hazırladığı ölkənin 2006-cı il üçün yanacaq-energetika balansını təsliqləyib. Bu barədə Trend ə nazirlikdən məlumat verilib. Balansa qazın həcmi ilə bağlı dəyişikliklər edilib.
2006-cı ildə Azərbaycanda 5 mlrd 914 mln m3 qaz hasil ediləcəyi nəzərdə tutulmuşdu. Təsdiqlənmiş balansda bu göstərici Rusiyadan idxal olunacaq qaz nəzərə alınmadan 7,3 mlrd m3-ə bərabərdir. Bu həcm Azərbaycan Beynəlxalq Əməliyyat Şirkəti ilə danışıqlardan sonra müəyyən olunub. Qərara alınıb ki, ABƏŞ Azərbaycana "AÇG" yatağından 3,3 mlrd m3 qaz, bu ildən hasilatın başlanacağı "Şah-Dəniz" qaz-kondensat yatağından isə 3,3 mlrd m3 qaz verəcək. Rusiyadan 1000 m3-i 110 dollardan 4,5 mlrd m3 qazın idxalı nəzərdə tutulur.
Proqnoza əsasən, bu il AR DNŞ işlənən yataqlardan təxminən 8 mln 750 min ton neft hasil edəcək. Bu il respublikada 24 mlrd 360 mln kVt elektrik enerjisinin istehsalı nəzərdə tutulub. 2006-cı ildə 2 mlrd 750 mln kVt elektrik enerjisi idxal ediləcək.
