Bakı-Tbilisi-Ceyhan və Cənubi Qafqaz kəmərlərinin tikintisi üçün torpaq sahələrinin ayrılması zamanı əhaliyə kompensasiyaların ödənilməsi ilə bağlı heç bir problem yoxdur. Bu barədə, Trend agentliyinin məlumatına əsasən, Torpaq və Xəritəçəkmə üzrə Dövlət Komitəsinin rəhbəri Qərib Məmmədov bildirib.
Torpaq sahələri Azərbaycanda 443 km boyunca ayrılıb. Bu proses 13 inzibati rayonu və təxminən 5 min nəfəri əhatə edib. Kompensasiyaların verilməsi ölkə rəhbərliyi, hökumət, Milli Təhlükəsizlik Nazirliyi və Dövlət Komitəsinin nəzarətindədir.
Əhalinin əsas problemi ondan ibarətdir, BTC Co şirkəti əvvəl tikinti üçün 500 metr enində olan dəhlizin ayrılmasını nəzərdə tutmuşdu, lakin sonralar bu rəqəm 58 metrə qədər azaldıldı. Beləliklə, 58 metrdən 500 metrədək olan zolaqda yaşayan və əvvəllər sənədləri toplanmış vətəndaşlar hesab edirlər ki, onlara kompensasiya ödənilməlidir.
