Azərenerji SC Sumqayitda yeni buxar-qaz qurğusunun inşası çərçivəsində qaz kəmərinin çəkilişinə başlayıb. Bu kəmərlə stansiyaya qaz veriləcək. Bu barədə Trend "Azerenerji" SC-yə istinadən xəbər verib.
Qaz kəmərinin tikintisi "Azərtunelsutikinti" yerli tikinti-quraşdırma şirkəti tərəfindən həyata keçirilir. Şirkət prezidenti Əzizağa Hüseynovun sözlərinə görə, hazırda bütün nazirlik və qurumlarla işin razılaşdırılması həyata keçirilir. Qaz kəmərinin layihələşdirilməsi ilə "Azəriqaz"ın mütəxəssisləri məşğuldur. "Azəriqaz" Sumqayit qolunun magistral qaz kəmərinə qoşulmasını təmin edəcək.
"Əsas kəmər Pirəküşkül qəsəbəsindən, elektrik stansiyasından 26 km aralı keçir. Burada təzyiq stansiyası tikmək, Sumqayit qolunu kəmərlə birləşdirmək və kəməri elektrik stansiyasına qoşmaq planlaşdırılır. Bu əməliyyatlara "Azəriqaz" tərəfindən icazə verilir. Bizim işimiz kəməri enerji blokuna çatdırmaqdır, çünki layihəyə əsasən bu yeraltı kəmər olacaq. Tikintinin müddətini qısaltmaq üçün işlər iki briqada tərəfindən həyata keçirilir" - deyə Ə.Hüseynov vurğulayıb.
720 sm diametrində olan borular sifariş olunub. Yaxın vaxtlarda ilk boru partiyası Sumqayita çatdırılacaq. Bu işlər 2006-cı ilin noyabrına qədər davam edəcək.
Sumqayit elektrik stansiyasının direktoru Məmmədhəsən Babayevin sözlərinə görə, sahələr hazırlanır, qaz turbini və buxar aqreqatı quraşdırılır, dispetçer mərkəzi tikilir.
Regionların və yanacaq-energetika sektorunun inkişafı üzrə dövlət proqramına daxil edilmiş BQQ-nun tikinti layihəsi prezident İlham Əliyevin təşəbbüsü ilə həyata keçirilir. 506 MVt-lıq BQQ-nın quraşdırılması baş podratçı Siemens-ə tapşırılıb.