"Bəzi itkilərə baxmayaraq, alternativə malik olmaq üçün Bakı-Novorossiysk boru kəmərini əldə saxlamaq lazımdır. Bu, bizim qəti fikrimizdir", - deyə bu gün Azərbaycan Dövlət Neft Şirkətinin yüksək vəzifəli nümayəndəsi Trend ə bildirib.
Onun sözlərinə görə, Azərbaycan Dövlət Neft Şirkəti ziyanı özü çəkmək istəmir. "Biz ABƏŞ konsorsiumunda iştirak edən şirkətlərin itkinin bir hissəsini öz gəlirlərindən bizə ödəmələrini istəyirik. Biz hesab edirik ki, şimal marşrutunun taleyi ABƏŞ və ARDNŞ-in qarşılıqlı qərarından asılıdır", - deyə o bildirib.
"Azəri-Çıraq-Günəşli" yatağından hasil edilən yüngül neftin dəmir yolu ilə Batumi limanına ixracının dayandırılması məsələsinə gəlincə isə, ARDNŞ nümayəndəsi bildirib ki, BTC boru kəməri tam gücü ilə işləməyə başladıqdan sonra neftin dəmir yolu ilə ixracına ehtiyac duyulmur.
