Azeri Drilling Company müştərək müəssisəsi "8 mart" yatağında qazma işləri aparmaq üçün iki qazma qurğusunu müasirləşdirəcək. Daha bir avadanlıq dəsti isə xaricdən gətiriləcək. Bu barədə Trend ə ARDNŞ-dən məlumat verilib. Xaricdən gətirilən avadanlıqlardan tam istifadə mümkün deyil. Çünki bu avadanlıqların istehsalına ən azı 10 ay vaxt lazımdır.
Azeri Drilling Company MM Britaniyanın Firstdrill Ltd və Target Petroleum şirkətləri arasında yaradılıb. Şirkət "8 Mart" yatağında işlərin həyata keçirilməsi üçün burada bir neçə özülü bərpa edəcək və müasirləşdirəcək.
Bu il "Nərimanovneft" NQÇİ-yə daxil olan "8 mart" yatağında 3 yeni quyu qazılacaq. Bu layihəni gerçəkləşdirmək üçün hazırda istismar olunmayan 3 özülün təmiri lazımdır.
ARDNŞ-dən bildirilib ki, hazırda dalğıclar tərəfindən tədqiqatlar başa çatıb və özüllərin istifadəsi üçün müsbət nəticə verib. Özüllərdə Azeri Drilling Company-nin qazma avadanlıqları quraşdırılacaq.
Hazırda "Azərdəniznefttikinti" və "Xəzərdənizneftqaztikinti" trestlərinin mütəxəssisləri üst özüllərin bərpasına başlayıb.
Avqustun 15-də 730 saylı özülün istismara verilməsi planlaşdırılır. Digər 2 özül isə sentyabrda istismara veriləcək.
1988-ci ildən istismarda olan "8 mart" yatağından sutkada 1 mln kub metr qaz hasil edilir. Yataq Abşeron yarımadasının cənubunda 25-50 m dərinlikdə yerləşir. Hazırda yataqda yüksək debitli bir neçə quyu fəaliyyət göstərir. 1989-cu ildə qazılmış 589 saylı quyu artıq 17 ildir ki, təmirə dayanmayıb. Quyu sutkada 400 min kub metr qaz və 30 ton kondensat verir. Bu ilin iyununda bu sahədə sutkada 100 ton neft və 40 min kub metr qaz verən yeni quyu istismara verilib.
Geoloqların qiymətləndirmələrinə görə, "8 mart" yatağında xeyli həcmdə çıxarıla bilən neft, qaz və kondensat ehtiyatları var. Hazırda onlar yeni quyuların qazılması üçün 9 nöqtə seçib. 6 m dərinlikdə quyuların 3 qazma qurğusundan qazılması nəzərdə tutulur. Qazma işləri yarım il ərzində başa çatacaq. 3-4 yeni quyunun istismara verilməsi hasilatı 2 dəfə artırmağa və dövlətə 2,5 mln kub metr qaz verməyə imkan yaradacaq.
