Azərbaycan Dövlət Neft Şirkəti (ARDNŞ) və Rusiyanın "RussHeft" ASC MŞ yaxın 7-10 gün ərzində Azərbaycanın "Hövsanı" - "Zıx" quru yataqlarının işlənilməsi üzrə PSA tipli müqaviləni imzalamaq niyyətindədirlər. Bu barədə Trend ə ARDNŞ-dən bildiriblər.
"Zıx" yatağının uzunluğu 3,25 km, eni isə 1,75 km-dir. Abşeron yarımadasında olan bu yatağın məhsuldar layları 1470-2800 metr dərinlikdə yerləşir. Yataq 1935-ci ildən istismar olunur. "Hövsanı" yatağı Bakıdan 20 km şərqdə, Hövsanı qəsəbəsində yerləşir. Yatağın uzunluğu 6 km, eni isə 5 km-dir. Qərb və şərq hissələrindən ibarət olan bu yataq 1947-ci ildən istismar olunur.
"Hövsanı" - "Zıx" yataqlarının işlənilməsi üzrə PSA tipli müqavilə bir qədər əvvəl Rusiyanın digər bir şirkəti - "LUKoyl"la imzalanmışdı. Lakin ekoloji məsələlərə görə müqavilə Rusiya şirkəti tərəfindən pozulmuşdu.
ARDNŞ təmsilçisinin sözlərinə görə, "LUKoyl"dan fərqli olaraq, "RussNefti"in müqavilə sahəsi az olacaq, amma "yatağa müvafiq olacaq".
"RussNeft" 2002-ci ilin sentyabr ayında yaradılıb. Bu gün şirkətin gündəlik neft hasilatı 17 mln. tondan çoxdur. Çıxarılan ehtiyatlar isə 630 mln. tondan artıqdır. "RussNeft"in balansında 30 hasilat aktivi, 3 neft emalı zavodu, 1 nəqliyyat müəssisəsi və 300 yanacaqdoldurma kompleksi var.