Bu il Azərbaycan ARDNŞ-in işlədiyi "Günəşli" yatağının dayaz hissəsində qaz hasilatının həcminin demək olar ki, 50% artmasına nail olub. Hazırda bu yataqdan qaz hasilatının həcmi sutkada 6 mln. kub metrdən 10,35 mln. kub metrədək artıb. Trend in xəbər verdiyi kimi, bu barədə ARDNŞ-dən məlumat verilib.
2006-cı ilin yekunları üzrə ARDNŞ-in işlədiyi yataqlardan qaz hasilatının həcmi ötən illə müqayisədə 1 mlrd. kub metr artacaq. 2005-ci ildə şirkət 3930,6 mln. kub metr qaz hasil edib. Bunun 3824 mln. kub metri "Azneft" İB-nin, 106'6 mln. kub. metri MM və əməliyyat şirkətlərinin payına düşüb.
Gələn il ARDNŞ qaz proqramının gerçəkləşdirilməsi hesabına hasilatı 2 mlrd. kub. metr artırmaq niyyətindədir. Bu proqram çərçivəsində "Neft Daşları" və "Günəşli"də iki kompressor stansiyasının inşası nəzərdə tutulur. Bundan başqa, 53 km uzunluğunda yüksək və alçaq təzyiqli qaz boru kəmərlərinin çəkilməsi planlaşdırılır.
Alçaq təzyiqli qazın sıxılması və sahilə nəqli üçün "Günəşli" yatağında qaz-kompressor stansiyalarının inşası üzrə tenderin qalibi ABŞ-ın Forqel Finans LTD şirkəti olub.
Razılaşmaya əsasən, lazımi avadanlıq bu ilin noyabrından 2007-ci ilin aprelinədək tədarük olunacaq. Bu il isə tikinti-quraşdırma işlərinə başlanacaq.