2006-cı ilin yanvar-noyabr aylarında "Azəri"-"Çıraq"-"Günəşli" (AÇG) dəniz blokunu mənimsəyən Azərbaycan Beynəlxalq Əməliyyat Şirkəti (ABƏŞ) müxtəlif istiqamətlərdə 18,726 mln. ton Azeri Light nefti ixrac edib, bu isə ötən ilin analoji dövründən 8,502 mln. ton neft çoxdur.
ABƏŞ-dən Trend ə verilən xəbərə görə, yanvar-noyabr ayında Bakı-Supsa boru kəməri üzrə ("Qərb" marşrutu) 5,616 mln. ton neft ixrac olunub, 2005-ci ilin yanvar-noyabr aylarında isə bu göstərici 6,329 mln. ton olub.
Bakı-Novorossiysk boru kəməri üzrə ("Şimal" marşrutu) yanvar-noyabr aylarında 2,883 mln. ton neft ixrac olunub, 2005-ci ilin yanvar-noyabr aylarında isə 2,364 min ton neft ixrac olunub.
Gürcüstanın Batumi limanı istiqamətində 2006-cı ilin yanvar-noyabr aylarında 3,870 mln. ton neft, 2005-ci ilin yanvar-noyabr aylarında isə 1,571 mln. ton neft göndərilib. Bakı-Tbilisi-Ceyhan (BTC) boru kəməri ilə 2006-cı ilin yanvar-noyabr aylarında 6 mln. 357,2 min ton neft ixrac olunub.
2006-cı ilin noyabr ayında ABƏŞ neftinin ixracı 2,092 mln. ton, 2005- cı ilin noyabr ayında isə 1,277 mln. ton təşkil edib. Bakı-Supsa boru kəmərində texniki problemlər və boru kəmərində görülən işlər səbəbindən bu kəmərlə bu ilin noyabr ayında neft ixrac olunmayıb. Ötən ilin noyabr ayında bu həcm 572,1 min ton təşkil edib. Bakı-Novorossiysk boru kəməri ilə 2006-cı ilin noyabr ayında 293,598 min ton, 2005-ci ilin noyabr ayında isə 340,6 min ton ixrac olunub. 2006-cı ilin noyabr ayında Batumi limanından 232,284 min ton, 2005-ci ilin noyabr ayında isə 364,9 min ton neft göndərilib. Noyabr ayında BTC boru kəməri ilə 1 mln. 567 min ton neft ixrac olunub.
