Azərbaycan Dövlət Neft Şirkəti (ARDNŞ) 2007-ci ildə Bakı-Novorossiysk marşrutlu şimal neft kəməri ilə neft nəqlindən tamamilə imtina edə bilər.
Yanvarın 1-dən elektrik stansiyalarının mazut rejiminə keçməsi üzündən neftin nəqli dayandırılıb, bunun nəticəsində ARDNŞ-in bütün nefti Bakı NEZ-ə emal olunmaq üçün göndərilir.
"Ölkədə mövsümi olaraq elektrik enerjisinə tələbatın azalması və "Şahdəniz" qaz kondensat yatağından qaz hasilatının başlanması ilə əlaqədar olaraq ikinci və üçüncü kvartalda ARDNŞ-də bəzi həcmdə xam neft azad ola bilər" - deyə mütəxəssislər söyləyib.
Azərbaycan onun emalını Bakı NEZ-də davam etdirə və alınan neft məhsullarını ixraca göndərə bilər, bununla belə Bakı-Novorossiysk neft kəməri ilə neft nəqlini bərpa etməz.
"Azad olunmuş həcmdə xammalın Bakı-Supsa və Bakı-Tiflis-Ceyhan (BTC) neft kəməri ilə ixrac olunacağı istisna olunmur"-deyə ekspertlər qeyd edib.
Hazırda Bakı-Supsa neft kəməri texniki səbəblərə görə işləmir. Fevral-martda onun istismara cəlb olunacağı istisna olunmur. 2007-ci ilin aprelində nasos stansiyalarında dizel yanacağının "Şahdəniz" yatağından çıxarılacaq təbii qazla əvəzlənməsi hesabına BTC neft kəməri ildə 50 mln ton neft nəqli layihə gücünə çıxa bilər.
Bakı-Novorossiysk neft kəməri ilə 1 ton neftin nəqlinə olan tariflər 15,67 dollar, Bakı-Supsada isə 3,7 dollar təşkil edir.