Azərbaycan, Bakı /müx. Trend S.Əliyev/ Azərbaycan və Rusiya arasında elektrik enerjisinin mübadiləsinin bərpası ilə bağlı müqavilə mayın ilk günlərində təsdiq ediləcək. Bu barədə bazar ertəsi günü məlumat verən "Azərenerji" Səhmdar Cəmiyyətinin vitse-prezidenti Marlen Əsgərov bildirib ki, tərəflər arasında əldə edilən anlaşmaya əsasən artıq enerji mübadiləsinin qiymətləri müəyyənləşdirilib. Lakin o, bunu kommersiya sirri kimi dəyərləndirərək, konkret rəqəmlər açıqlamayıb.
Onun sözlərinə görə, qiymət dəyişiklikliyinə baxmayaraq, tariflər hər iki tərəfi qane edir. Müqavilə ilin sonuna kimi qüvvədə qalacaq. Tərəflərdən biri müqavilənin uzadılmasından imtina etsə, bir ay öncə digərini xəbərdar etməlidir. "Əgər bu, baş verməsə, müqavilə avtomatik olaraq uzadılacaq" - deyə Əsgərov bildirib.
Güman olunur ki, yeni müqavilə üzrə iş mayın 1-dən sonra başlayacaq.
Aprelin əvvəlindən etibarən Rusiyadan Azərbaycana enerjinin idxalı dayandırılıb. Hazırda iki ölkə arasında enerji mübadiləsi sıfır səviyyəsində davam etdirilir. Yəni Rusiyadan idxal olunan enerji eyni miqdarda geri qaytarılır.
Əvvəlki razılaşma 2007-ci ilin sonunadək nəzərdə tutulsa da, tariflər yalnız birinci rüb üçün qəbul olunub. Birinci rübdə Rusiyadan Azərbaycana enerjinin idxalı 2006-cı ildə tətbiq olunan qiymətlə (1 kVt/s üçün 3,636 sent ) gerçəkləşdirilib. Azərbaycandan Rusiyaya ixrac olunun enerjinin qiyməti isə 1,58 sentdən (1 kVt/s) 1,8 sentədək artırılıb.
