Gələn ilin əvvəlində Azərbaycan İrana elektrik enerjisi üzrə borcun bir hissəsini qaytara bilər
Azərbaycan, Bakı / Trend müxbir S.Əliyev/ Azərbaycan bu il ərzində İrana elektrik enerjisinn qaytarılmasını həyata keçirəcək. "Azərenerji" səhmdar cəmiyyətinin vitse-prezidenti Marlen Əsgərovun verdiyi məlumata görə, lazım olarsa bu proses gələn ilin əvvəlində də davam etdirilə bilər.
Hazırda Azərbaycan İran qarşısında enerji borcunun qaytarılmasına başlayıb. Azərbaycanın İrandan alınan elektrik enerjisi üzrə borcunun həcmi təxminən 400 mln. kVt/saat təşkil edir.
İrandan alınan enerji hesabına Naxçıvan Muxtar Respublikası elektrik enerjisi ilə təmin olunur, hazırda muxtar respublikaya 10-15 mln. kV/saat elektrik enerjisi çatdırılır.
Azərbaycan İrandan qışda enerji çatışmazlığı olduğu dövrdə elekrik enerjisi alır, yayda, yəni, İranda çatışmazlıq müşahidə olunan zaman geri qaytarır.
Razılığa əsasən əgər Azərbaycan bir il ərzində elektrik enerjisini tam həcmdə qaytara bilməzsə, bu halda borcları pulla ödəməlidir. İrana elektrik enerjisinin qaytarılması 11% artıqlaması ilə aparılır və bu ötürülmə zamanı İran tərəfinin itkisi kimi qiymətləndirilir.
