Azərbaycan, Bakı, 04 oktyabr/ Trend , müxbir S.Babayeva/ Cari ilin yanvar-avqust ayları ərzində Naxçıvan Muxtar Respublikasında (NMR) 14,5 mln. manatlıq rabitə xidməti göstərilib ki, bu da 2007-ci ilin analoji dövr göstəricisindən 56,5 faiz çoxdur. NMR-nın Bakıdakı daimi nümayəndəliyindən şənbə günü verilən məlumata görə, göstərilən xidmətlərin 79,5 faizi və ya təqribən 11,5 mln. manatı özəl şirkətlərin payına düşüb və burada 62,1 faiz artım qeydə alınıb.
Muxtar Respublikanın Rabitə və İnformasiya Texnologiyaları Nazirliyi tərəfindən göstərilən xidmətin dəyəri təqribən 3 mln. manat təşkil edib ki, bu da 2007-ci ilin analoji dövr göstəricisini 37,7 faiz ötür. İdarə səkkiz ay ərzində 2597 ədəd telefon xətti çəkib.
NMR Azərbaycanın qərb hissəsində yerləşir. O, şimal və şərqdə Ermənistan, qərb və cənubda isə Türkiyə və İranla həmsərhəddir. NMR-nın ümumi sahəsi 5,5 min kvadrat kilometr, əhalisinin sayı isə 360 min nəfərdən çoxdur. Muxtar Respublikanın paytaxtı Naxçıvan şəhəridir.
Məqalə müəllifi ilə əlaqə ünvanı - [email protected]