Azərbaycan, Bakı, 14 noyabr / Trend , müxbir S.Babayeva/ "2008-ci ilin sonunadək Azərbaycanın Rabitə və İnformasiya Texnologiyaları Nazirliyi NGN (Next Generation Network) şəbəkəsinin yaradılmasını nəzərdə tutan "Elektron Şamaxı" layihəsinin ikinci mərhələsini yekunlaşdıracaq", - Aztelekom İstehsalat Birlyinin rəhbəri Məhəmməd Məmmədov deyib.
"Hazırda biz abonentlərimizə genişzolaqlı xidmətlər təklif edirik. Layihənin ikinci mərhələsinin də əsasında bu dayanır", - Məmmədov söyləyib.
Azərbaycanın Rabitə Nazirliyi "Elektron Azərbaycan" Dövlət Proqramının mikromodeli olan "Elektron Şamaxı" layihəsinin birinci mərhələsini 2007-ci ildə reallaşdırıb. Layihənin məqsədi Şamaxıda bu gün yalnız mərkəzdə və rayonun 23 kəndində işləyən rabitənin NGN texnologiyaları əsasında bərpasıdır.
Hazırda bölgənin bütün sakinlərinin IP- telefoniya, İnternet, televiziya və Data-xidmətlərindən istifadə imkanları var. Bunun üçün bütün kənd ATS -lərində və Şamaxının mərkəzi ATS -ndə Sloveniyanın Iskratel şirkətinin zəruri avadanlığı quraşdırılıb.
Layihənin dəyəri açıqlanmır.
NGN (növbəti nəsil şəbəkə) paketlərin kommutasiyasından istifadə etməklə, nitqin, təsvirin və məlumatların ötürülməsi üçün nəzərdə tutulmuş çoxməqsədli universal şəbəkədir. NGN şəbəkəsi telekommunikasiya qrafikinin müxtəlif növləri üçün zəruri olan xidmət keyfiyyətini təmin edir. Yuxarıda adı çəkilən texnologiyanın tətbiqi abunəçilərə VİP-telefon, səs poçtu, məlumatların ötürülməsi xidməti, multimedia xidmətləri, özəl virtual şəbəkələr, unifikasiya edilmiş məlumat mübadiləsi, sürətli məlumat mübadiləsi, interaktiv səsli cavab sistemi xidmətləri, videokonfrans və ev meneceri kimi xidmətlərdən istifadə etmək imkanı verəcək.
"Bu layihə həmin bölgədə "Elektron hökumət" layihəsinin reallaşdırılması üçün əsasdır", - Aztelekom rəhbəri deyib: "Biz infrastruktur yaratmışıq, qalanı müxtəlif təşkilatların işidir, onlar özlərinə lazım olan bu xidmətləri və sistemləri özləri tətbiq edəcəklər".
Azərbaycanın Rabitə Nazirliyi bu xidmətləri ölkənin digər bölgələrində də tətbiq etməyə hazırlaşır.
Məqalə müəllifi ilə əlaqə ünvanı: [email protected]
