Azərbaycan, Bakı, 09 sentyabr / Trend , müxbir H.Vəliyev /
2008-2012-ci illərdə Azərbaycanın təhsil sisteminin informatizasiyası üzrə dövlət proqramının həyata keçirilməsi çərçivəsində şagirdlərin sayı üzrə kompüterlərin sayı çoxalıb. Bu barədə "III Azərbaycan Beynəlxalq Təhsil və Karyera Sərgisi"nin açılması ilə bağlı mətbuat konfransında jurnalistlərlə söhbətdə təhsil naziri Misir Mərdanov deyib.
Təhsil Nazirliyi rəhbərinin sözlərinə görə, əvəllər 29 məktəbliyə bir kompüter düşürdüsə, indi bu rəqəm 26 nəfərə enib.
Nazirlik tərəfindən paytaxtda 20 məktəbin Təhsil Nazirliyi və Bakı şəhər Baş Təhsil İdarəsini əlaqələndirən simli-optik şəbəkəyə qoşulması üzrə işlər başa çatdırılıb. İlin sonunadək şəbəkəyə qoşulan məkətblərin sayı 50-yə çatacaq. Bu, təhsil müəssisələrinin yüksəksürətli internet şəbəkəsinə qoşulmasına imkan verəcək. İşlər "Elektron məktəb" pilot layihəsi çərçivəsində həyata keçirilir.
Proqramın əsas məqsədi İT-dən istifadə etməklə təhsilin keyfiyyətini artırmaq üçün vahid təhsil informasiya mühitinin yaradılması və ölkənin dünya təhsil sisteminə inteqrasiyasının təşkil edilməsidir. Bu, ölkənin təhsil sistemini effetli şəkildə idarə etməyə, eləcə də qlobal şəbəkə vasitəsilə xarici ölkələrin təhsil müəssisələri ilə əlaqə yaratmağa imkan verəcək.
Hazırda təhsil portalının yaradılması üzrə işin birinci mərhələsi başa çatıb. Portalın funksiyası 4 istifadəçi qrupuna: müəllim, şagird, tələbə və valideynlərə girişə imkan verir, onlardan hər biri üzrə xüsusi interfeys müəyyənləşdirilib. Nazirin sözlərinə görə, bu günə portalda müəllimlər üçün açıq olan təxminən 300 elektron tədris resursu yerləşdirilib. İlin sonunadək təxminən 20 min müəllim yeni texnologiyalarla iş vərdişlərinin mənimsənilməsi üzrə treninqlər keçəcəklər.
Məqalə müəllifi ilə əlaqə ünvanı: [email protected]
