Azərbaycan, Bakı, 02 oktyabr / Trend , müxbir H.Vəliyev/
AztelekomNet və BakinterNet dövlət internet-provayderləri ADSL texnologiyası ilə internet şəbəkəsinə giriş qiymətlərini endirib. Bu barədə Rabitə və İnformasiya Texnologiyaları Nazirliyindən məlumat verilib.
Seçilmiş tarif planından asılı olaraq abunəçilərin yüksək sürətli giriş üçün xərci 15 manatdan (256 Kbit/s) 350 manatadək (6144 kbit/s) təşkil edir.
Bu istiqamətdə ilk addım AzStarNet şirkəti tərəfindən avqustun sonunda atılıb. Şirkət məhdud trafiklə 2 tarif planı təqdim edib: "Ev" və "Biznes". "Ev" tarif planına 2 paket "Standart" və "Ekstra" paketləri daxildir ki, bunların da qiyməti seçilən trafikdən asılı olaraq 25-155 manat arasında dəyişir.
Hazırda ADSL-in ən minimal tarifi Smart Sistems şirkətində qeyd edilib. Bu yaxınlarda qüvvəyə minən Smart Sistems tariflərinə müvafiq olaraq, ADSL-in aylıq abunə haqqı 5 manatla (128 Kbit/s) 48 manat (2048Kbit/s) arasında dəyişir.
Sentyabrın əvvəlindən genişzolaqlı giriş tarifləri Connect, Ultel, Azeronline, Uninet (Stream) və IntraNS şirkətləri tərəfindən də endirilib. Yaxın zamanlarda Avirtel, və AzEuroTel şirkətləri də ADSL xidmətinin yeni tariflərini təqdim etməyi planlaşdırırlar.
Qiymətlərin endirilməsi ilk provayder olan Delta Telecom tərəfindən rabitə kanalları tariflərinin növbəti endirilməsi sayəsində mümkün olub. Tariflər 1 Mbit/s-a görə 275 manatdan 110 manata endirilib. Yeni tariflər sentyabrın 1-dən qüvvəyə minib. Sonuncu qiymət endirimi cari ilin fevral ayında qeyd edilib.
Məqalə müəllifi ilə əlaqə ünvanı: [email protected]
