Azərbaycan, Bakı, 14 may /Trend, müxbir H.Vəliyev/
"Elektron təhsil" respublika müsabiqəsinə 347 layihə təqdim olunub. Bu barədə Azərbaycanın Təhsil Sisteminin İnformasiyalaşdırılması İdarəsinin məlumatında deyilir.
Müsabiqə təhsil sisteminin 2008-2012-ci illərdə informasiyalaşdırılması üzrə dövlət proqramı çərçivəsində keçirilir və Microsoft Azerbaijan, HP, Intel, Azerfon-Vodafone, Ultra şirkətləri, həmçinin AZEDUNET layihəsi və tərəfindən dəstəklənir.
Müsabiqə iki istiqamət üzrə təşkil olunub: "Müasir məktəbdə elektron təhsil resursları" və "Təhsildə internet texnologiyaları".
"Müasir məktəbdə elektron təhsil resursları" istiqaməti üzrə müsabiqəyə "Fənlərin tədrisində İT-nin tətbiqi üzrə ən yaxşı metodika" nominasiyası üzrə 119 layihə, "İbtidai təhsil sistemində İT-nin tətbiqi üzrə ən yaxşı metodika" nominasiyası üzrə 63 layihə, "Elektron təhsil resurslarının istifadəsi ilə təhsil prosesinin ən yaxşı modeli" nominasiyası üzrə 124 layihə təqdim olunub.
"Təhsildə internet texnologiyaları" istiqaməti üzrə müsabiqəyə "Təhsildə internet resursları" nominasiyası üzrə 23 layihə və "Müəllimlərin bloqları" nominasiyası üzrə 11 layihə təqdim olunub.
Müsabiqənin əsas məqsədi təhsil prosesində elektron təhsil resurslarının və internet texnologiyalarının tətbiqinin populyarlaşdırılması, bu sahədə təhsil ictimaiyyətinin məlumatlandırılması, təhsil məqsədləri üçün internetin tətbiqinin yeni formalarının aşkara çıxarılması, həmçinin təhsil sistemində İT-ni tətbiq edən müəllimlərin stimullaşdırılmasıdır.
İkimərhələli səsvermə Təhsil Nazirliyinin formalaşdırdığı münsiflər heyəti tərəfindən keçiriləcək. Beş nominasiyadan hər biri üzrə qaliblərə noutbuklar, netbuklar və digər hədiyyələr veriləcək.