Azərbaycan, Bakı, 4 oktyabr /Trend, müxbir H.Vəliyev/
Azərbaycan və Meksika informasiya-kommunikasiya texnologiyaları sahəsində əməkdaşlıq haqqında hökumətlərarası saziş imzalayacaqlar. Bu barədə Azərbaycanın Rabitə və İnformasiya Texnologiyaları Nazirliyinin bazar ertəsi yaydığı məlumatda deyilir.
Məlumata görə, sazişin oktyabrın 11-12-də Beynəlxalq Kommunikasiya İttifaqının (ITU - International Telecommunication Union) səlahiyyətli konfransında imzalanacağı gözlənilir. Konfrans oktyabrın 4-22-də Meksikada keçiriləcək.
Azərbaycan nümayəndə heyətinə rabitə və informasiya texnologiyaları naziri Əli Abbasov başçılıq edəcək.
Konfransda dövlət başçıları da daxil olmaqla, dünyanın 160 ölkəsindən iki minə yaxın nümayəndənin iştirakı gözlənilir.
Səlahiyyətli konfrans tərkibində 192 ölkənin, 700-ə yaxın özəl şirkətin, eləcə də təşkilatın gələcək siyasətinin işlənib hazırlanması üçün cavabdeh olan milli, regional və beynəlxalq təşkilatın olduğu ITU-nun ali orqanıdır.
Dörd ildə bir dəfə çağırılan konfransda ümumi siyasət müəyyən edilir, dördillik strateji və maliyyə planı qəbul edilir, təşkilatın ali rəhbərliyi və şura üzvləri seçilir.
Azərbaycan ITU şurasına seçkilər üzrə "C" regionu ölkələri qrupuna öz namizədliyini irəli sürüb.
Bundan əvvəlki seçkilərdə Azərbaycan seçkilərdə 57 səs qazanaraq təşkilatın "C" regionu ölkələri qrupu üzrə şuraya daxil ola bilməmişdi. Seçkilər beş region üzrə keçirilir - "A", "B", "C", "D" və "Е".
