Azərbaycan, Bakı, 4 oktyabr /Trend, müxbir H.Vəliyev/
Azərbaycan və Gürcüstan sərhədyanı ərazilərdə GSM və CDMA rabitəsinin tezlik resurslarından istifadə prosedurunu razılaşdırıblar. Bu barədə bazar ertəsi Trend-ə Dövlət Radiotezliklər İdarəsinin (DRİ) baş mühəndisi İlham Əfəndiyev deyib.
Əfəndiyevin sözlərinə görə, tərəflər imzalanması müzakirə olunduqdan sonra gözlənilən protokolu hazırlayıblar.
Saziş radiotezlik spektrindən istifadəni sadələşdirəcək və sərhədyanı ərazilərdə radioelektron vasitələrin mümkün pozuntu yaratmalarının qarşısını xeyli azaldacaq.
Tərəflər GSM rabitəsi üçün 1800 və 900 MHz tezlik spektrindən və simsiz CDMA rabitəsi üçün istifadə olunan 800 MHz tezliyindən bərabərhüquqlu istifadənin kriteriyalarını razılaşdırıblar.
Gürcüstan və Azərbaycan tərəfləri yeni baza stansiyadan və eyni tezlik resurslarından istifadə edirlər ki, bu da bir-birinə münasibətdə interferensiya yaradır. Tərəflər GSM standartında istifadə olunan 900 MHz tezliyi zolağındakı 124 kanalın yarıya bölünməsi barədə razılığa gəliblər. "Tərəflərdən hər biri 60 kanaldan istifadə edəcək, qalan dörd kanal isə ehtiyat zolaq qismində bərabərhüquqlu şəkildə istifadə olunacaq", - Əfəndiyev qeyd edib.
CDMA operatorları arasında kanallar analoji şəkildə bölüşdürülüb. Orada Gürcüstan və Azərbaycan tərəfləri öz aralarında yeddi kanal bölüşdürüblər. Üç kanal Azərbaycan, digər üç kanal Gürcüstan tərəfindən istifadə olunacaq, bir kanal isə ehtiyatda olacaq. DRİ mühəndisinin sözlərinə görə, yerdən asılı olaraq Azərbaycanın GSM operatorlarının istifadə etdikləri kanalların sayı (900 və 1800 MHz tezlik diapazonlarında) 20 və 41 ədəd arasında dəyişir. Daha çox kanal sayı sərhədyanı ərazilərin payına düşür.