Azərbaycanda texnologiya parklarının tikintisində İsrailin təcrübəsindən istifadə oluna bilər
Azərbaycan, Bakı, 17 mart /Trend, müxbir H.Vəliyev/
İsrailin "Wazana Group" şirkəti Azərbaycanda texnologiya parklarının və biznes inkubatorlarının yaradılmasında kömək göstərməyə hazırdır. Bunu "Wazana Group" şirkətinin idarəetmə və investisiyalar üzrə məsləhətçisi Yuri Yakub bildirib. Trend-in məlumatına görə, bu barədə AMEA-nın İnformasiya Texnologiyaları İnstitutunun məlumatında deyilir.
Bu sahədəki əməkdaşlıq məsələləri İTİ rəhbərliyinin Yakubla görüşündə müzakirə edilib. Mütəxəssisin Azərbaycana səfəri tanışlıq xarakteri daşıyır.
Onun sözlərinə görə, "Wazana Group" şirkəti Azərbaycanda İKT sahəsində məhsul və xidmətlərin istehsalı üzrə biznes inkubatorlarının yaradılmasında əməkdaşlığa hazırdır. Söhbət strateji məsləhətləşmələrdən, idarəetmədən, investisiyalardan, büdcənin artırılmasından və s. gedir.
Görüş zamanı qeyd olunub ki, texnoparkların və biznes inkubatorlarının yaradılması Azərbaycanın İKT sektoruna xarici şirkət və potensil investorları cəlb edə, elektron avadanlıqların istehsalını qaydaya sala, yeni iş yerləri yarada bilər ki, bu da ölkəni regionda İKT avadanlıqlarının aparıcı ixracatçısına çevirər.
Yakub Azərbaycanın bu sahədə gördüyü işləri yüksək qiymətləndirib və deyib ki, texnoparkların və biznes inkubatorlarının yaradılması ölkənin elmi, intellektual və istehsal potensialından tam həcmdə istifadə etməyə və inkişaf etdirməyə imkan verər.
Azərbaycanda regional innovasiya zonası (RİZ) yaradılması İT sənayesinin inkişafının prioritet istiqamətləri kimi müəyyən olunub. Bu gün Azərbaycanda RİZ yaradılmasına dair təklif hökumətin müzakirəsindədir. Hazırda müzakirə olunan mühüm məsələlərdən biri vergilərin, sosial və gömrük rüsumlarının azaldılması və bəzi hallarda sıfıra endirilməsi məsələsidir. Bu məsələlərin müsbət həlli xarici şirkətlərin, investorların cəlb edilməsi, yerli şirkətlərin möhkəmləndirilməsi və RİZ-də istehsal olunan məhsulun ixracı üçün münasib şərait yaradacaq.
RİZ-in yaradılması layihəsində onların həyata keçirilməsində müsbət rol oynayacaq beş əsas istiqamət yer alıb. Bu, informasiya resursları üçün DATA mərkəzin yaradılması, informasiya xidmətlərinin göstərilməsi, insan resurslarının, orta və kiçik sahibkarlığın inkişafı, investisiyaların cəlb edilməsi və ölkənin ixrac potensialının inkişafıdır.
