Azərbaycan, Bakı, 21 iyun /Trend, müxbir H.Vəliyev/
"Bakı Telefon Rabitəsi" İstehsalat Birliyi (İB) simsiz CDMA xidmətinin əhatə zonasını genişləndirir. Bu barədə çərşənbə axşamı Trend-ə İB-nin CDMA xidmətləri üzrə şöbə müdiri Murad Cəbrayılov məlumat verib.
Cəbrayılovun sözlərinə görə, ilin sonunadək operator dörd yeni əlavə baza stansiyasının quraşdırılmasını planlaşdırır ki, bu da operatorun nömrə tutumunu hazırkı 13 mindən 20 min ədədədək artırmağa imkan verəcək.
"Operatorun CDMA şəbəkəsinin montaj tutumu 50 min nömrə təşkil edir ki, bu da tələbatın artması ilə əlaqədar artırılacaq", - o deyib.
Bu gün "Bakı Telefon Rabitəsi" İB-nin simsiz CDMA şəbəkəsi Bakı və Abşeron yarımadasını əhatə edir. CDMA standartında rabitə xidmətləri "511" indeksi üzrə göstərilir. "Bakı Telefon Rabitəsi" abonentlərə regional səviyyədə rabitə xidmətlərinin göstərilməsi üçün "Aztelekom" İB ilə əldə olunmuş razılaşmaya görə respublikadaxili rouminqdən ("Aztelekom" şəbəkəsi ilə respublikanın 30-a yaxın rayonu əhatə olunub) istifadə edir.
DSL-ə genişzolaqlı çıxışın alternativi olan CDMA naqil çəkilişinin həddindən artıq baha başa gəldiyi ucqar rayonlarda əhalinin internet şəbəkəsinə çıxışını asanlaşdırır.
