Azərbaycan, Bakı, 28 dekabr /Trend, müxbir H.Vəliyev/
2012-ci ilin yanvar-fevralında Europe Persia Express Gateway (EPEG) layihəsinin Azərbaycan hissəsinin test buraxılışı gözlənilir. Bu barədə çərşənbə günü Trend-ə "Delta Telecom" şirkətinin texniki direktoru Rahid Ələkbərli deyib.
Ələkbərlinin sözlərinə görə, hazırda instalyasiya və şəbəkə infrastrukturunun test rejiminə gətirilməsi üzrə işlər aparılır. Həmçinin, beynəlxalq birləşmələr infrastrukturunun yaradılması, şəbəkələrin birləşdirilməsi və həcmlərin tranziti nəzərdə tutulur.
EPEG layihəsi çərçivəsində reallaşdırılan optik-lif kabel magistralının Azərbaycan hissəsinin tikintisinin dəyəri üç milyon avro həcmində qiymətləndirilir.
EPEG kabel magistralının yaradılması üzrə konsorsiuma İranın TIC (Telecommunication Infrastructure Company), Omanın "Omantel", Rusiyanın "Rostelekom" şirkətləri və C&W beynəlxalq şirkəti (Cable&Wireless) daxildir. "Delta Telecom"un infrastrukturu həm beynəlxalq internet-kanalların trafiki həcmlərinin tranziti, həm də səs xidmətləri və məlumatların ötürülməsi kimi xidmətlərlə təmin etməyə qadirdir.
EPEG kabel marşrutu başlanğıcını Omandan götürür və Frankfurtadək çəkiləcək. Gözlənildiyinə görə, kabel operatorları EPEG-in yaradılmasında iştirak etməyən 3 ölkənin ərazisindən də keçməlidir. Söhbət Azərbaycan, Polşa və Ukraynadan gedir. Bu marşrutlar 3 dövlətdən hər birində icarəyə götürülən qurğularda təşkil ediləcək.
EPEG kabel magistralının buraxılış qabiliyyəti 3,2 Tbit/s təşkil edəcək. Onun uzunluğu isə 6 min kilometrə çatacaq. Layihənin ilkin dəyəri təxminən 200 milyon dollar qiymətləndirilir. Kabel magistralının 2012-ci ilin mayında işə salınması gözlənilir.