Azərbaycan, Bakı, 16 oktyabr /Trend, müxbir H.Vəliyev/
"Microsoft Azerbaijan" şirkəti "Windows 8" əməliyyat sisteminin Azərbaycan dilinə lokallaşdırılmasına başlayıb. Bu barədə Trend-ə çərşənbə axşamı şirkətdən bildiriblər.
Əməliyyat sisteminin dil paketinin lokallaşdırılması əvvəl lokallaşdırılan versiyaların sxeminə uyğun həyata keçiriləcək. Layihəyə peşəkar tərcüməçilər cəlb edilib. İşlər çərçivəsində, həmçinin, "Windows Phone" əməliyyat sisteminin lokallaşdırılması planlaşdırılır.
İnterfeys məhsulunun Azərbaycan dilinə tərcüməsi ilə bağlı işlərin 2013-cü ilin ortalarında başa çatdırılması planlaşdırılır.
Hazırda "Microsoft"un Azərbaycan dilinə lokallaşdırılan məhsulları arasında Windows XP, Windows Vista, Windows 7 əməliyyat sistemləri, həmçinin Microsoft Office 2003, Microsoft Office 2007 və Microsoft Office 2010 ofis paketləri var.