Azərbaycan, Bakı, 21 avqust /Trend, müxbir H.Vəliyev/
AzNET seqmentində real fişinq-insidentlərin sayı 6,6 faiz azalıb. Trend-in məlumatına görə, bu barədə cümə günü "Netcraft" analitik şirkətinin hesabatında deyilir.
Hesabata əsasən, Azərbaycanda hər 1441 saytın (.az domenində) payına fırıldaqçılar üçün bir səmərəli fişinq-hücum düşür. Hücumlar bu və ya digər halda pul və ya istifadəçinin şəxsi məlumatlarını əldə etmək məqsədi daşıyır.
Təhlil "MozillaFirefox" və "InternetExplorer" brauzerləri üçün modul olan "NetcraftToolbar" proqramı əsasında hazırlanıb. Proqram istifadəçini potensial təhlükəli internet-resurslar, eləcə də fişinq-hücumların qarşısının alınması barədə xəbərdar edir.
"Netcraft"ın məlumatına görə, Azərbaycanda "NetcraftToolbar" hazırda 4324 fərdi kompyuterdə quraşdırılıb ki, bu da 2012-ci ilin aprel ayının göstəricisindən altı faiz aşağıdır.
Fişinq-hücum populyar brendlərin adından kütləvi elektron poçt göndərişləri ilə həyata keçirilir. Məktubda zahirən həqiqidən fərqlənməyən bu brendin yalançı saytına bilavasitə istinad edilir. Belə sayta düşən zaman istifadəçi fırıldaqçılara akkaunt və bank hesablarına daxil olmağa imkan verən qiymətli informasiyanı ötürə bilər.
