Azərbaycan, Bakı, 14 oktyabr /Trend, müxbir H.Vəliyev/
2013-cü ilin yanvar-sentyabr aylarında Rabitə və İnformasiya Texnologiyaları Nazirliyinin (RİTN) strukturuna daxil olan birlik və müəssisələr tərəfindən 39 867,4 min manat investisiya qoyuluşu həyata keçirilib. Trend-in məlumatına görə, bu barədə RİTN-in 9 ayın yekununa həsr edilmiş hesabatında deyilir.
Ümumilikdə informasiya, rabitə və poçt sektoruna 142,6 milyon manat investisiya qoyulub ki, bunun da ölkə iqtisadiyyatına qoyulan ümumi investisiyada payı 1,2% təşkil edir.
Həyata keçirilmiş investisiya layihələri çərçivəsində hesabat dövründə 31 yeni EATS istismara verilib, 19 ATS-də genişləndirmə işləri aparılıb, 31 ədəd TV-radio vericisi quraşdırılıb (o cümlədən 22-si rəqəmli vericidir) və 11 ədəd poçt şöbəsi binası tikilib (2 ədədi Naxçıvan MR RİTN üzrə), eyni zamanda, 7 ədəd inzibati, 14 ədəd PŞ binası təmir olunub.
Nəticədə respublikanın ümumi telefon şəbəkəsi üzrə montaj tutumu 1 790 122 nömrəyə çatdırılıb, 673,3 km (o cümlədən 546,9 km Aztelekom və 4,.4 km BTRİB, 85 km-i isə özəl şirkətlər tərəfindən çəkilib) fiber-optik kabel çəkilib.
Hesabat dövründə "Aztelekom" İB tərəfindən respublikanın bölgələrində telefon şəbəkəsinin modernləşdirilməsi üçün 14,5 milyon manat investisiya yatırılıb, şəbəkənin tutumu 3056 nömrə artırılıb, 546,9 km fiber-optik kabel çəkilib.
"Aztelekom" və BTRİB şəbəkəsi üzrə özəl provayderlər də nəzərə alınmaqla montaj olunan genişzolaqlı internet portlarının sayı 495 700-ə çatdırılıb və onlardan 394 056-sı istifadə olunur.
BTRİB şəbəkəsinin rekonstruksiyası və genişləndirilməsi üçün təqribən 5,4 milyon manat həcmində investisiya qoyuluşu həyata keçirilib və bunun nəticəsində 2 ədəd yeni ATS tikilib, 12 064 nömrə tutumu istismara verilib, 41,4 km fiber-optik kabel çəkilib, şəbəkənin tutumu 1628 nömrə artırılıb. Həmçinin, "Aztelekom" İB və BTRİB üzrə CDMA abunəçilərinin sayı 31 124 ədəd təşkil edir.
Hesabat dövründə əsas telefon aparatlarının ümumi sayı 1 465 431 ədədə çatıb.