Azərpoçt Dövlət müəssisəsi (DM) Western Union sistemi üzrə Azərbaycanın 14 bölgəsinə poçt pul köçürmələri həyata keçirir. Müəssisədən Trend ə verilən xəbərə görə, bu bölgələrə Şəmkir, Tərtər, Ağstafa, Goranboy, Naftalan, Qazax, Bərdə, Gədəbəy, Daşkəsən, Gəncə, Xanlar, Mingəçevir, Samux və Yevlax daxildir. Bakının 36 poçt şöbəsində bu xidmət göstərilir.
Parabank KB və Azərpoçt DM arasında bu sistemin tətbiqi üzrə saziş 2005-ci ilin may ayında tətbiq edilib. Sazişə əsasən, ilk dəfə bu köçürmələr 2005-ci il oktyabrın 10-11-də Bakının 1 və 11 saylı poçt şöbələrində həyata keçirilib.
Azərbaycanın Rabitə və İnformasiya Texnologiyaları Nazirliyinin qurumlarının tərkibinə daxil olan müəssisə olaraq, Azərpoçt DM-in fəaliyyəti məktub və korrespondensiyanın çatdırılmasından, teleqraf, elektron poçtu, internet, beynəlxalq telefon danışıqları üzrə xidmətlərin göstərilməsindən, daxili və xarici poçt göndərişlərinin daşınmasından, milli stildə hazırlanmış açıqca və zərflərin, marka və nişanların satışından, sürətli və adi pul köçürmələrinin göndərilməsindən, təqaüd və müavinətlərin ödənilməsindən ibarətdir.
