Bakıda "Müasir şəraitdə poçt rabitəsi sahəsində insan resursları potensialının yüksəldilməsi" mövzusunda keçirilən beynəlxalq seminar bu gün öz işini başa çatdırıb. Azərbaycan Rabitə və İnformasiya Texnologiyaları Nazirliyinin dövlət müəssisələrinin fəaliyyətinin koordinasiyası şöbəsinin poçt sektorunun müdiri Novruz Məmmədovun Trend ə verdiyi məlumata görə, tədbirdə müxtəlif mövzuda, o cümlədən "Poçt rabitəsi müəssisələri üçün kadrların hazırlanması" mövzusunda məruzələr dinlənilib. Ümumdünya Poçt İttifaqının nümayəndəsi "Treninqlərin təşkili üzrə strategiyalar və proqramlar", "Trainpost" proqramı və distansion təhsil", "AzTelekom" İB-nin tədris mərkəzinin başçısı Qəzənfər Rüstəmov "Kadrların təkmilləşdirilməsində distansion təhsilin rolu" mövzusunda, eləcə də Rusiya, Ukrayna və Estoniya nümayəndələri məruzələrlə çıxış ediblər.
Sabah Rabitə Sahəsində Regional Birliyin (RRB) poçt rabitəsi üzrə komissiyasının 23-cü iclası və RRB-nin poçt rabitəsi operatorları şurasının 12-ci iclası öz işinə başlayacaq. İclaslar zamanı poçt rabitəsi sahəsində bir sıra məsələlər müzakirə olunacaq.
