Azərbaycan Rabitə və İnformasiya Texnologiyaları Nazirliyi (ARİTN) Azərbaycanda superkompüter mərkəzinin yaradılması layihəsinin maliyyələşdirilməsi üçün mənbələrin öyrənilməsi üzrə iş aparır. Trend in ARİTN-ə istinadən xəbər verdiyi kimi, layihənin texniki-iqtisadi əsaslandırılması hazırlanır və bu istiqamətdə dünya təcrübəsi öyrənilir. "Hal-hazırda bəzi müəssisələrlə layihənin 2007-2008-ci illərdə maliyyələşdirilməsinə dair danışıqlar aparılır", - deyə dövlət qurumunda vurğulanıb.
Azərbaycanda superkompüter mərkəzinin yaradılması layihəsi $10-12 mln. dəyərində qiymətləndirilir. Superkompüterlə təchiz olunmuş mərkəz 2005-2008-ci illər üçün Azərbaycanda rabitə və informasiya-kommunikasiya texnologiyalarının inkişafı üzrə Dövlət Proqramı ("Elektron Azərbaycan") çərçivəsində yaradılacaq.
Layihə gerçəkləşdirildikdən sonra qəzet, televiziya elektron arxivləri hazırlanacaq ki, bu da gələcəkdə bu resurslardan heç bir vaxt itkisi olmadan istifadə etməyə imkan yaradacaq.
Bütövlükdə, "Elektron Azərbaycan" Dövlət Proqramına daxil olan layihələr $372 mln. dəyərində qiymətləndirilir. Hazırda proqram çərçivəsində yalnız Dünya Bankı ilə birgə maliyyə xidmətinin inkişafı üzrə layihə həyata keçirilir. Layihənin əsas komponenti Azərbaycanın poçt sistemlərinin təkmilləşdirilməsidir.
Proqramda nəzərdə tutulmuş tədbirlərin həyata keçirilməsi nəticəsində müasir tələblərə uyğun rabitə və informasiya texnologiyaları infrastrukturunun yaradılması, yeni texnologiyların mənimsənilməsi və informasiya cəmiyyətinə keçidin əsaslarının yaradılması gözlənilir.
