Oktyabrın 2-də Bakıya səfəri zamanı Cisco Systems şirkətinin prezidenti və baş icraçı direktoru Con Çembers (John Chambers) Azərbaycan rəhbərliyi ilə danışıqlar aparmağı planlaşdırır. Bu barədə Trend Cisco Systems şirkətinin məlumatına istinadən xəbər verir.
Məlumatda bildirilir ki, Con Çembers telekommunikasiya və informasiya texnologiyaları üzrə BakuTell-2006 12-ci beynəlxalq sərgi və konfransında iştirak edəcək.
Şirkətin digər ölkələrlə fəaliyyətinə gəlincə, məlumatda deyilir ki, bu həftə Mərkəzi və Şərqi Avropa ölkələrinə səfəri zamanı Con Çembers bəyan edib ki, Cisco Türkiyə iqtisadiyyatının inkişafı üçün $275 mln sərmayə qoymağı planlaşdırır. Bundan başqa, şirkət bu ölkədə Cisco-nun 200 şəbəkə akademiyasını açmağı vəd edib. Bütün bunlar Türkiyənin informasiya-texnologiya sahəsinin inkişafına kömək edəcək.
