Bakıda "İnformasiya azadlığının gerçəkləşdirilməsində İnternetin rolu: mövcud vəziyyət və perspektivlər" mövzusunda dəyirmi masa keçirilib. Tədbir Multimedia İnformasiya Sistemləri və Texnologiyaları Mərkəzi tərəfindən "Dövlət orqanlarının və Mədən sənayesində şəffaflıq təşəbbüsünə qoşulan neft şirkətlərinin informasiya açıqlığının monitorinqi və vətəndaşların informasiya hüququnun gerçəkləşməsinə dəstək" layihəsi çərçivəsində təşkil olunub. Trend in xəbər verdiyi kimi, dəyirmi masada mərkəzin direktoru, layihənin rəhbəri Osman Gündüz, MEQA şirkətinin meneceri Qabil Qasımov və layihənin eksperti Azər Həsrət iştirak edib. Görüşdə dövlət orqanlarının və neft şirkətlərinin internet resurslarının monitorinqi əsasında Multimedia Mərkəzi tərəfindən hazırlanan növbəti reytinq cədvəli açıqlanıb.
Bundan başqa, dəyirmi masada neftçilərin hüquqlarını Müdafiə Komitəsinin rəhbəri Mirvari Qəhrəmanlı, Rabitə və İnofrmasiya Texnologiyaları Nazirliyi dövlət orqanlarının fəaliyyətini əlaqələndirmə şöbəsinin müdiri Əflatun Məmmədov, Siyasi İnnovasiyalar və Texnologiyalar Mərkəzinin sədri Mübariz Əhmədoğlu, Konstitusiya Fondunun rəhbəri Əliməmməd Nuriyev, Milli Məclis aparatı İnformasiya Texnologiyaları şöbəsinin əməkdaşı Yaşar Əməşov, Media Hüquqları İnstitutunun direktoru Rəşid Hacılı və başqaları iştirak edib.
Ictimai informasiyaların internet resursları vasitəsilə yayılması, dövlət internet resurslarının keyfiyyəti, qanunla açıqlanması məcburi olan informasiyaların İnternetdə yerləşdirilməsi vəziyyəti ətrafında ciddi müzakirələr aparılıb.
Müzakirələrdə dövlət qurumlarının və neft şirkətlərinin İnternet resurslarının təkmilləşdirilməsi, dövlət büdcəsindən bu istiqamətdə məqsədli vəsaitlərin ayrılması, dövlət internet resurslarının müntəzəm olaraq monitorinqinin keçirilməsi və digər məsələlərə də toxunulub.
