Azərbaycan, Bakı/ Trend müxbir S.Babayeva/ Azərbaycan beynəlxalq təşkilatlarla gələcək rabitə peykinin - Azərsat gücünün bir hissəsinin satılması barədə danışıqlar aparır. Bu barədə jurnalistlərə cümə axşamı Azərbaycanın rabitə və informasiya texnologiyaları naziri məlumat verib.
Azərbaycan balaca ölkədir və peykin bütün ehtiyatlarından istifadə edə bilməz. Ölkə yalnız peykin 20-25 faiz gücündən istifadə edə bilər. "Boş qalan tutum isə onun əhatə dairəsinə düşən ölkələrə satılmalıdır",-deyə nazir bildirib.
AzərSat peykinin əhatə dairəsinə Avropa və Asiyanın bir hissəsi - Qazaxıstan, Türkmənistan, İran daxil olacaq. Hazırda Nazirlikdə beynəlxalq təşkilatların da nümayəndələrinin daxil olduğu xüsusi işçi qrupu AzərSat layihəsi üzrə fəaliyyət göstərir. Layihənin 80-100 mln. dollar civarında dəyərləndirilən maliyyə mənbəyi isə hələ ki, tapılmayıb. 2008-ci ildə Azərbaycan orbitdə sputnik üçün yer almaq niyyətindədir. Onun buraxılışı isə 2010-cu ildən sonra baş verə bilər.
