"Əl-Qaidə" terror təşkilatında ikinci adam olan Əymən əz-Zəvahiri Türkiyəni İslam dünyasına xəyanətdə və Əfqanıstanın Qərb ölkələri tərəfindən işğal edilməsinə dəstək verməkdə günahlandırır. Bu barədə CNN Turk saytı yazır.
Əz-Zəvahirinin Türkiyənin əfqan ordusuna təlim keçirilməsi üçün bu yaxınlarda Əfqanıstana əsgər göndərməsi ilə əlaqədar səsi eşidilən videoyazı terror təşkilatının saytında yerləşdirilib.
Yanvarın sonunda Türkiyənin 16 vilayətində "əl-Qaidə" beynəlxalq terror şəbəkəsinin Türkiyə özəyinin fəaliyyəti ilə əlaqəli olmaqda şübhəli bilinən 120 nəfər saxlanılıb.
Axtarışlar nəticəsində saxlanılan şəxslərin evlərindən iri həcmdə silah və partlayıcı maddələr, həmçinin "əl-Qaidə"nin fəaliyyət və planlarına aid mühüm sənədlər aşkar olunub.