Bakı. Trend:
İsveçin iqlim naziri Romina Purmohtari, hökumətin iqlim siyasətini qiymətləndirən İqlim Siyasəti Şurasının illik hesabatının təqdimatına qatılmaqdan imtina edib.
Trend xəbər verir ki, bu, nazirin tədbirə məhəl qoymadığı ilk haldır. Bu il tədbirdə başqa hökumət nümayəndələri də iştirak etməyəcək.
“Dagens Nyheter” nəşrinin məlumatına görə, əvvəlcə Purmohtarinin adı iştirakçılar siyahısında olsa da, sonradan gündəm proqramından çıxarılıb. Hökumət bu qərarın səbəbini izah etməyib, İqlim Siyasəti Şurası isə şərh verməkdən imtina edib.
Linçöping Universitetindən olan iqlimşünaslar bu qərarı həyəcanverici siqnal kimi qiymətləndirib. Onların fikrincə, hökumət rəsmilərinin tədbirdə iştirakdan imtinası iqlim siyasətinə marağın azaldığını göstərə bilər.
Hesabatda kənd təsərrüfatının iqlimə təsirinə xüsusi diqqət yetirildiyi üçün kənd yerləri naziri Peter Kullgren də təqdimata dəvət edilmişdi. Lakin o da iştirakdan imtina edib.
Nazirlərin tədbirdə olmaması İsveç hökumətinin İqtisadi Əməkdaşlıq və İnkişaf Təşkilatının (İƏİT) son tənqidlərinin fonunda baş verir. Keçən il İqlim Siyasəti Şurası hökumətin 2030 və 2045-ci il iqlim hədəflərinə çatmaq üçün konkret plan təqdim etmədiyini bildirmişdi.
İsveçin Yaşıllar Partiyası iqlim nazirinin tədbirdə iştirak etməməsini “heyrətləndirici” adlandırıb və bunun hökumətin iqlim məsələlərinə aşağı prioritet verdiyini göstərdiyini vurğulayıb.
Buna baxmayaraq, tədbirdə nazirin dövlət katibi Daniel Vestlen iştirak edəcək.