Bakı. Trend:
Moqadişoda hərbi xidmət mərkəzi yaxınlığında baş verən partlayışda azı 11 nəfər həyatını itirib, bir neçə nəfər isə yaralanıb.
Trend xəbər verir ki, bu barədə X kanalı və Somali TV məlumat yayıb.
İnsident Damaanyo hərbi bazasında, Somali Milli Ordusuna işə qəbul zamanı baş verib. Dalsan radiostansiyası partlayışın kamikadze hücumu olduğunu bildirir. Şahidlərin sözlərinə görə, yaralılar təcili yardım gələnədək motorlu rikşalarla yaxınlıqdakı xəstəxanalara aparılıb.
Hadisəyə görə hələlik heç bir qrup məsuliyyəti üzərinə götürməyib, Somali rəsmiləri isə ölənlərin rəsmi sayını açıqlamayıb. Təhlükəsizlik qüvvələri kamikadzenin necə təhlükəsiz əraziyə daxil olduğunu araşdırır və hadisə baş verən ərazini mühasirəyə alıb.