Bakı. Trend:
Böyük Britaniyanın paytaxtı smartfon oğurluğunun “epidemiyası” ilə üzləşib. “Nyu-York Times” qəzeti yazır ki, 2024-cü ildə Londonda rekord sayda - 80 minə yaxın smartfon oğurlanıb. Bu yerli hüquq mühafizə orqanlarının cinayətkar oğru şəbəkələrə qarşı irimiqyaslı əməliyyata başlamasına səbəb olub.
Bu barədə Trend xarici KİV-ə istinadən xəbər verir.
Məlumata görə, oğrular elektrik velosipedlərində piyadalardan telefonları zorla alır və daha sonra cihazlar mağazalar şəbəkəsi vasitəsilə digər ölkələrə göndərilir. Son reydlər zamanı polis təxminən 2 min oğurlanmış telefon və 200 min funt sterlinq ($267 min) nağd pul aşkar edib. Cinayətkar qrupun təşkilatçıları olduğu güman edilən şəxslər saxlanılıb. Bildirilir ki, onlar izləmə siqnallarını bloklamaq üçün alüminium folqa istifadə edirdilər.
Ekspertlər cinayətkarlığın artmasını 2010-cu illərdə Böyük Britaniyanın hüquq-mühafizə orqanlarının maliyyələşməsinin azaldılması və elektrik velosipedlərinin yayılması ilə əlaqələndirirlər; elektrik velosipedlər sürətli hərəkət üçün ideal vasitəyə çevrilib.