Bakı. Trend:
Azərbaycan Milli Məclisinin deputatı Xanlar Fətiyev Müstəqil Dövlətlər Birliyinin Parlamentlərarası Assambleyasının Nəzarət-büdcə Komissiyasının sədr müavini seçilib.
Bu qərar oktyabrın 17-də Sankt-Peterburqdakı Tauride sarayında baş tutan komissiyanın iclasında qəbul edilib. İclasda milli parlamentlərin deputatları və MDB PA Şurası Katibliyinin rəsmiləri MDB Parlamentlərarası Assambleyasının maliyyə təminatı ilə bağlı bir sıra məsələlərini müzakirə ediblər.
Gündəliyə MDB PA-nın fəaliyyətinin cari maliyyələşdirilməsi, Assambleyanın büdcəsinin formalaşdırılması və icrası məsələləri də daxil edilib. Komissiya üzvləri MDB PA-nın üzvü olan dövlətlərdə 2025-ci il dövlət büdcəsi haqqında qanunların qəbulu ilə bağlı məlumat mübadiləsi aparıb, MDB PA-nın fəaliyyətinin maliyyə aspektlərinə dair MDB PA Şurasının qərarlarının layihələrini hazırlayıblar.
Təşkilati məsələlər də müzakirə edilib və qərarlar qəbul edilib; yerli normativ aktların layihələrinə, o cümlədən, Parlamentlərarası Assambleyanın 2025-ci il üçün iş planının maliyyə təminatı məsələlərinə baxılıb.
