Azərbaycan, Bakı, 23 oktyabr / Trend , müxbir S.Kazımlı / Bakının Yasamal rayon ərazisində yerləşən təcili yardım stansiyasındakı insidentlə bağlı araşdırma aparılır.
Yasamal rayon Polis İdarəsindən (RPİ) çümə axşamı Trend -a verilən məlumata görə, oktyabrın 21-də, saat 21.00 radələrində Yasamal rayonu, Şərifzadə küçəsi, 144 ünvanında yerləşən təcili yardım stansiyasında həkim işləyən, Bakı şəhər sakini, 50 yaşlı Seyraz Rasim oğlu Rəhimov stansiyanın baş həkim, 45 yaşlı Dilbər Hüseyn qızı Məmmədovanın iş otağının pəncərəsini sındırıb, neft məsulu tökərək baş həkimin otağını və dispetçer otağını yandırıb.
Rayon Polis İdarəsindən bildiriblər ki, hadisə Rəhimovun iş ilə bağlı şikayətlərinə cavab verilməməsi səbəbindən baş verib. Belə ki, Rəhimov işdən çıxarılması ehtimalları ilə bağlı şikayətlərinə cavab verilmədiyi üçün əsəbləşib və baş həkimlə mübahisə edib, bundan sonra həmin hadisələri törədib. Hadisədən sonra Rəhimov polis əməkdaşları tərəfindən saxlanılıb, ifadəsi alındıqdan sonra isə sərbəst buraxılıb.
Faktla bağlı Yasamal RPİ-də araşdırma aparılır.
Məqalə müəllifi ilə əlaqə ünvanı:[email protected]
