Azərbaycan, Bakı, 15 yanvar /Trend, müxbir K.Zərbalıyeva/
Ötən ilin son 3 ayında respublikada 7 partlayış hadisəsi qeydə alınıb.
Fövqəladə Hallar Nazirliyinin rəsmi saytının yaydığı məlumata görə, ötən ilin oktyabr, noyabr və dekabr aylarında qeydə alınan partlayışların 4-ü fərdi yaşayış evlərində, 2-si çoxmənzilli yaşayış evlərində, 1-i isə texnoloji qurğularda baş verib.
Partlayışlar zamanı 1 nəfər ölüb, 10 nəfər xəsarət alıb.
140 qəza-xilasetmə əməliyyatı zamanı FHN əməkdaşları tərəfindən 178 nəfər xilas edilib, 6 nəfər dünyasını dəyişib.
Qəza-xilasetmə əməliyyatlarından 7-si partlamamış silah-sursatın aşkarlanması, 1-i mənzildə qaz sızması, 89-u mənzildə bağlı qapı arxasında kimsəsiz və köməksiz insan faktorunun olması, 52-si liftdə qalma ilə bağlıdır.
Ötən ilin son rübündə 1 126 yanğın hadisəsi zamanı 21 nəfər dünyasını dəyişib, 27 nəfər xəsarət alıb, 1 nəfər xilas edilib. 2009-cu ilin müvafiq dövrü ilə müqayisədə yanğınlar artıb.
2009-cu ilin 4-cü rübündə 810 hadisə zamanı 10 nəfər dünyasını dəyişib, 15 nəfər xəsarət alıb, 31 nəfər xilas olunub.