Azərbaycan, Bakı, 31 mart /Trend, müxbir K.Zərbalıyeva/
Bakı polisi narkotiklərin qanunsuz dövriyyəsi ilə məşğul olan iki nəfər keçmiş məhkumu saxlayıb.
Daxili İşlər Nazirliyinin mətbuat xidmətindən Trend-ə verilən məlumata görə, Nərimanov rayon Polis İdarəsinin 17-ci polis bölməsinin əməkdaşlarının həyata keçirdikləri əməliyyat-axtarış tədbirləri nəticəsində Bakı şəhər sakini, əvvəllər məhkum olunmuş Şirxan Quliyevdən 0,293 qram heroin götürülüb.
Quliyevin ətrafında aparılmış əməliyyat tədbirləri nəticəsində onun martın 28-də Cavid Soltanova məxsus "Mercedes" markalı və martın 29-da Mirzalı Tapdıqlıya məxsus "Mercedes" markalı avtomaşınlardan oğurluq etdiyi də müəyyənləşdirilib.
Binəqədi rayon Polis İdarəsinin 40-cı polis bölməsinin əməkdaşlarının həyata keçirdikləri əməliyyat-axtarış tədbirləri nəticəsində isə Hövsan qəsəbə sakini, əvvəllər məhkum olunmuş Elçin Məhərrəmovdan 715 qram tiryək götürülüb.
Hər iki faktla bağlı cinayət işi başlanıb, istintaq aparılır.