Azərbaycan, Bakı, 8 yanvar /Trend/
Bərdədə iki minik avtomobili aşıb.
Trend Kanal S-ə istinadən xəbər verir ki, hadisələrdə 6 nəfər müxtəlif dərəcəli xəsarətlərlə Bərdə Mərkəzi Rayon Xəstəxanasına çatdırılıb.
Hər iki hadisə Tərtər-Bərdə magistral yolunun Bərdə rayonunun Zümrüxan kəndindən keçən hissəsində qeydə alınıb. Qəza nəticəsində xəsarət almış Tərtər rayon Sarıcalı kənd sakinləri - 1977-ci il təvəllüdlü Tahirov Səməd Sadiq oğlu, 1973-cü il təvəllüdlü Mehtiyev Natiq Şura oğlu, 1983-cü il təvəllüdlü Əhmədov Ramil Şaiq oğlu və Kərimov Babək Kamandar oğlu, eləcə də Bərdənin Mirzəxan kənd sakinləri - 1978-ci il təvəllüdlü Rzayev Kənan Behbud oğlu və 1982-ci il təvəllüdlü Mahmudov Yəhya Rafiq oğlu Bərdə MRX-nin Travmatologiya şöbəsinə yerləşdiriliblər. Onlardan B.Kərimovun vəziyyətinin ağır olduğu bildirilir.
Xəstəxananın Travmatologiya şöbəsinin müdiri Nazim Səfərovun sözlərinə görə, qalan yaralıların həyatı üçün təhlükə yoxdur.
Qeyd edək ki, Bərdə Rayon Polis Şöbəsi və bu şöbənin DYP bölməsi sürücülərin şəxsiyyəti və qəzaların baş vermə səbəbləri barədə açıqlama verməkdən imtina edib.