İlk xəbər saat 09:56-da yayılıb
Bakı. Ceyhun Ələkbərov - Trend:
Bakı metrosunda relsin üzərinə düşən qadının kimliyi məlum olub.
Bu barədə Bakı Metropoliteni QSC-nin Mətbuat xidmətinin rəhbəri Bəxtiyar Məmmədov Trend-ə məlumat verib.
Onun sözlərinə görə, relsin üzərinə düşən qadın 1965-ci il təvəllüdlü Asya Əmirovadır.
Qadın xilas olunub, vəziyyəti normaldır.
XXX
Bakı metrosunda 54 yaşlı qadın relsin üzərinə düşüb.
Bakı Metropoliteni QSC-nin Mətbuat xidmətinin rəhbəri Bəxtiyar Məmmədov Trend-ə bildirib ki, bu gün səhər saat 09:35-də metronun "28 may" stansiyasında bir nəfər qadın relslərin üzərinə düşüb.
O, qeyd edib ki, hadisə “Həzi Aslanov”dan “28 may” istiqamətinə gələn qatarın hərəkəti zamanı baş verib: "Hazırda araşdırma aparılır. Araşdırmanın sonunda əlavə məlumat veriləcək".
B.Məmmədov hadisə baş verəndən sonra qatarların hərəkətinin 10 dəqiqə ərzində dayandığını qeyd edib. Hazırda hərəkət bərpa edilib.