Azərbaycan, Bakı, 29 noyabr /Trend, müxbir M.Salmanov/
1940-cı ildə ABŞ-ın Sietl şəhərində "Sears" ticarət şəbəkəsinə məxsus mağazanın kassasından az məbləğdə pul oğurlayan kişi pulu faizi ilə qaytarıb. Bu barədə çərşənbə axşamı Trend Lenta.ru-ya istinadən məlumat verir.
Məlumata əsasən, yaşlı kişi pul oğurladığı mağazanın piştaxtasına mağazanın meneceri üçün içində 100 dollar olan məktub qoyub. Kişi məktubda oğurluq etdiyini etiraf edib.
"Mən 1940-ci ilin sonunda mağazanın kassasından təxminən 20 və ya 30 dollar oğurlamışam. Mən təzminat hesabı olaraq 100 dolları qaytarmaq istəyirəm", - məktubda deyilir.
Mağazanın meneceri Qeri Lorentsonun sözlərinə görə, 60-dan çox yaşı olan kişi vicdan əzabı çəkib. Faizi ilə qaytarılan pulun ehtiyacı olanlara verilməsi planlaşdırılır.