Azərbaycan, Bakı, 20 mart / Trend , müxbir M.Əliyev/
Azərbaycan və Ermənistan parlamentarilərinin mayda Qazaxıstanın paytaxtı Astanada ATƏT-in iclası çərçivəsində növbəti görüşü keçirilə bilər. Bu barədə şənbə günü Azərbaycan Milli Məclisinin vitse-spikeri Bahar Muradova jurnalistlərə bildirib.
"ATƏT-in Parlament Assambleyasının Dağlıq Qarabağ münaqişəsi və Gürcüstan üzrə xüsusi nümayəndəsi Qoran Lenmarker Azərbaycan və Ermənistan parlamentarilərinin görüşünü təşkil edir və növbəti görüşün may ayında Astanada baş tutması mümkündür", - Muradova deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağın və işğal olunmuş ərazilərin azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.