Azərbaycan, Bakı, 16 dekabr /Trend, müxbir A.Axundov/
Ermənistanla müharibə olacağı təqdirdə, Azərbaycan Türkiyənin dəstəyinə ümid edə bilər. Bu barədə Trend-ə cümə axşamı Türkiyə Böyük Millət Məclisinin deputatı Onur Öymen deyib.
"Türkiyə Azərbaycanı istənilən şəraitdə dəstəkləyəcək. Biz Azərbaycanın işğal olunmuş ərazilərini qaytarmalıyıq, bu bizim dostluq, qardaşlıq və insani borcumuzdur", - o bildirib.
"Türkiyə Azərbaycan ərazilərinin işğal altında qalmaqda davam etdiyi bir zaman susa bilməz və biz bu barədə hər yerdə danışırıq", - Cümhurriyyət Xalq Partiyasının (CHP) xarici əlaqələr komissiyasının sədri Öymen bildirib.
Onun sözlərinə görə, Türkiyənin Dağlıq Qarabağ münaqişəsi ilə bağlı mövqeyi, ölkədə hansı partiyanın iqtidarda olmasından asılı olmayaraq, dəyişməzdir.
"Azərbaycanın məsələsi bizim üçün hökumət məsələsi yox, milli məsələdir. Heç bir hökumət xalqın iradəsinə və istəyinə qarşı çıxa bilməz. Dağlıq Qarabağ məsələsi Türkiyə xalqı üçün Kipr problemi kimi, milli miqyaslı problemdir", - Öymen qeyd edib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
Türkiyə rəhbərləri müxtəlif səviyyələrdə dəfələrlə bəyan ediblər ki, Türkiyə Azərbaycanın Dağlıq Qarabağ məsələsindəki ədalətli mövqeyini dəstəkləyir. Bundan başqa, onlar öz çıxışlarında dəfələrlə təkrar ediblər ki, Türkiyə Böyük Millət Məclisi Dağlıq Qarabağ münaqişəsi həll olunmayana qədər Ermənistan-Türkiyə protokollarını ratifikasiya etməyəcək.
Öymenin sözlərinə görə, Ermənistan-Türkiyə protokolları parlamentdən geri çağırılmalıdır.
Apreldə Ermənistan Prezidenti Serj Sarkisyan ötən ilin oktyabrında iki ölkənin xarici işlər nazirlərinin imzaladığı münasibətlərin normallaşdırılması haqqında Ermənistan-Türkiyə protokollarının parlamentdə ratifikasiya edilməsi prosedurunun dayandırılması barədə fərman imzalayıb.
Sarkisyan protokolların ratifikasiya edilməsi prosesinin müvəqqəti dayandırılmasını "milli maraqlarla" əsaslandırıb.
1993-cü ildə münasibətlərin pozulmasına və Türkiyə-Ermənistan sərhədlərinin bağlanmasına səbəb Yerevanın dünyada "erməni soyqırımı"nı tanıtmaq cəhdləri və Ermənistan Silahlı Qüvvələrinin Azərbaycan ərazilərini işğal etməsi olub.
