Avropa Parlamentinin qətnaməsi Azərbaycan diplomatiyasının uğurudur - rusiyalı ekspert

Azərbaycan, Bakı, 19 aprel /Trend, müxbir E.Tariverdiyeva/

Aİ-nin Azərbaycan və Ermənistanla assosiasiyalar haqqında saziş çərçivəsində danışıqları üzrə Avropa Parlamentinin yeni qətnaməsi, heç şübhəsiz, Azərbaycan diplomatiyasının uğurudur. Bunu "Vestnik Kavkaza" Analitik İnformasiya Agentliyinin baş redaktoru, Lomonosov adına MDU-nun tarix fakültəsinin dekan müavini, Trend-in Ekspert Şurasının üzvü, politoloq Aleksey Vlasov deyib.

"Şübhəsiz ki, Azərbaycan tərəfi mənəvi uğura çatıb. Xüsusən də qanunsuz yerləşdirmələr üzrə məsələdə", - Vlasov Trend-ə bildirib.

Avropa Parlamenti "Azərbaycan və Ermənistanla assosiasiya haqqında saziş çərçivəsində Aİ ilə danışıqlar üzrə qətnamə" qəbul edib. Qətnamədə Azərbaycanın ərazi bütövlüyünə ehtiram əks olunub. Bu barədə çərşənbə günü jurnalistlərə Azərbaycanın Xarici İşlər Nazirliyinin mətbuat katibi Elman Abdullayev bildirib.

Qətnamə Strasburqda Avropa Parlamentinin plenar sessiyasında qəbul olunub. Qətnamədə qeyd edilir ki, Azərbaycanın işğal edilmiş əraziləri geri qaytarılmayanadək, ərazilər Azərbaycanın nəzarəti altına keçməyənədək, qaçqınlar öz doğma torpaqlarına qayıtmayanadək Avropa İttifaqının "Şərq tərəfdaşılığı" proqramı çərçivəsində Azərbaycan və Ermənistanla assosiasiya haqqında saziş imzalanmayacaq.

Sənəddə həmçinin göstərilir ki, bir dövlətin ərazisinin digər dövlət tərəfindən işğalı faktı, beynəlxalq prinsiplərin pozulması Aİ-nin mehriban qonşuluq siyasətinin əsas prinsiplərinə ziddir və "Şərq tərəfdaşlığı" proqramına zərbə vurur. Sənəddə Azərbaycanın işğal edilmiş ərazilərində qanunsuz yerləşdirmə faktlarının araşdırılmasının zəruriliyi qeyd edilir.

Vlasovun fikrincə, digər tərəfdən, "Şərq tərəfdaşlığı" formatının özü belə qərarların tərəflərin güzəştə getməsinə təkan verməsi, Yerevanın isə Avropa Parlamentinin qətnamələrinin yerinə yetirməsi baxımından olduqca yumşaq və formasız görünür.

"Artıq "Şərq tərəfdaşlığı"nın son sammitində söhbət Cənubi Qafqaz problemlərindən düşən kimi Avropa bürokratlarının ifadələrinin olduqca dumanlı və qeyri-konkret olması aydın görünürdü. Bu bəyanatlar Yerevanı nə qədər "qorxuda" bilər? Düşünürəm ki, heç cür qorxuda bilməz", - ekspert qeyd edib.

Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az

Trend-in ən mühüm və maraqlı xəbərlərini "Telegram"da izləyin